గజల్ ఫైజ్ రాసిన ఉర్దూ పంక్తులు

...............Abd Wahed

ఈ రోజు మొదటి కవిత ఒక గజల్. గజల్ నిబంధనలను పాటిస్తూ అనువదించాలనుకోవడం ఒక పెద్ద సాహసమే అవుతుంది. అయినా ఫైజ్ రాసిన ఈ గజల్ ను సాధ్యమైనంత వరకు గజల్ ప్రక్రియలోనే అనువదించడానికి ప్రయత్నించాను. గజల్ లోని శబ్ధమాధుర్యం కూడా భావానికి బలాన్నిస్తుంది.

కష్టాలకు వివరణలూ లేనేలేవు కదా
మనోవ్యధకు సాంత్వనలు లేనే లేవు కదా

మరోసారి వాగ్దానం నిలబడనే లేదు
మరోసారి మాట నిజం కానేలేదు కదా

అమరత్వపు అనుమతులు పురుగులకూ లేవు
దీపాలకు ఒక్కరాత్రి రానేలేదు కదా

మత్తు రుచికి ముందే మనసు ఎగసిపడుతోంది
పరాకాష్ఠ ఈ గోష్ఠిలొ పలకనె లేదు కదా

తపిస్తున్న కళ్లముందు ఒక్కచూపు మెరిసి
కలవలేని రాత్రి గడిచి పోనేలేదు కదా

వ్యాజ్యాల ద్వారాలూ మూతపడే వేళ
మొత్తుకోళ్ళ నోళ్ళు మూత పడనె లేదు కదా

ప్రతిరోజూ ఫైజ్ నీకు కాళరాత్రి కదా
ఒక్కసారి పరిహారం దొరకనె లేదు కదా

ఫైజ్ రాసిన ఉర్దూ పంక్తులు

షరహ్ బేదర్దీ హాలాత్ న హోనే పాయీ
అబ్ కే భీ దిల్ కీ ముదారాత్ న హోనే పాయీ

ఫిర్ వహీ వాదా జో ఇక్రార్ న బన్ నే పాయా
ఫిర్ వహీ బాత్ జో అస్ బాత్ న హోనే పాయీ

ఫిర్ వో పర్వానే జిన్హే ఇజ్నే షహాదత్ న మిలా
ఫిర్ వో షమేం కె జిన్హే రాత్ న హోనే పాయీ

ఫిర్ వహీ జాం బల్బీ లజ్జత్ మై సు పహలే
ఫిర్ ఓ మహ్ఫిల్ జో ఖరాబాత్ న హోనే పాయీ

ఫిర్ దమ్ దీద్ రహే చష్మ్ ఓ నజర్ దీద్ తలబ్
ఫిర్ షబ్ వసల్ ములాఖాత్ న హోనే పాయీ

ఫిర్ వహాం బాబ్ అసర్ జానియే కబ్ బంద్ హో
ఫిర్ యహాం ఖతమ్ మనాజాత్ న హోనే పాయీ

ఫైజ్ సర్ పర్ జో హర్ ఇక్ రోజ్ ఖయామత్ గుజరీ
ఎక్ భీ రోజ్ మకాఫాత్ న హోనే పాయీ

ఇందిర\\గజల్\\

గాయపడిన గుండెలోనె గజలు ఒకటి మొలుస్తుంది
రాలిపడిన కంటినీరె బాధనంత గెలుస్తుంది

నీటిచుక్క నేలరాలి రూపుమాసి పోయినా
మొలకనవ్వు సిరులుపండి హరితవనం వెలుస్తుంది

రెప్పపాటు కాలమైన గొప్పదిలే ఓ `ఇందిర'
క్షణమొకటే మౌనముగా యుగములనే తొలుస్తుంది
అణువుతోడ పలికె భూమి తన చరితే ఘనతరమని
తరచిచూడ ఆ పుట్టుక మర్మమేదొ తెలుస్తుంది

రాశులుగా శాస్త్రాలను ఆపోశన పట్టితేమి
జీవితాన అనుభవమే నీ తోడుగ నిలుస్తుంది

*9\11\13

ఒంటరిగానే...పెన్నాశివరామకృష్ణ - గజల్,

నీడల నుంచీ నీ కన్నీటిని దాచుకునే రోదించాలి
ఒంటరిగానే దీపాలన్నీ ఆర్పుకునే రోదించాలి

గాయాలను నీ అతిథులుగా ఎపుడూ సంభావించుకొని
అతిథుల నందరినీ హృదయానికి హత్తుకునే రోదించాలి

జీవన దేవత కొక హారం కానుక ఇవ్వాలనుకుంటే
అశ్రువులను మరుమల్లెల మాలగ కూర్చుకునే రోదించాలి

గాయాలన్నీ సులోచానాలై లోకం తీరును తెలిపాయి
గాయం కూడా మనిషికి వరమని తెలుసుకునే రోదించాలి

దేహంతోనే దహనం అయ్యే రహస్య వేదన వేధిస్తే
నే హృదయాన్ని నీవే కౌగిలించుకునే రోదించాలి

ఆనందం మూయించిన కనులను, అశ్రువులే తెరిపించేది.
పవిత్ర గ్రంథంగా ప్రతి అశ్రువునూ మార్చుకునే రోదించాలి

ప్రతి వేదనకూ కారణమడిగే లోకంతోనే చిక్కంతా
ఎవరికి వినబడకుండా, పెదవులు మూసుకునే రోదించాలి

గాయపడడమే వ్యసనమైతె విలపించకురా " పెన్నా "
చెరగని గాయపు మరకను నిత్యం నిమురుకునే రోదించాలి

పాడలేని పాట.......పెన్నాశివరామకృష్ణ

పాడలేని పాట పదును ముల్లైపోయింది
నీవు లేని బతుకు కలత నిదురై పోయింది

దూతగ నా మనసునేల పంపితినో కాని
తిరిగి రాక నీ సిగలో విరియై పోయింది

నిన్ను చూడరాలేదని అంత కోపమేలా?
నీవు పయనమైన గడియె సిలువై పోయింది

మల్లెలుగా కురులలోన ముడుచుకుంటివేమో !
నా నింగిని ఒక్క తార కరువై పోయింది

నిద్ర రాని రాత్రి ఏ కావ్యమో చదువబోతే
ప్రతి పుట నీ ఛాయాచిత్రమై పోయింది

బాధ కూడ బహుమతి కద "పెన్నా" ఈ వేళ !
చెలి వేసిన శిక్ష నేడు గజలై పోయింది

మోహాన్ని పెంచే ముద్దు కంటే.....పెన్నాశివరామకృష్ణ - గజల్

దూరాలు పెంచే వెలుగు కంటే చీకటే ఎంతో నయం
హృదయాన్ని కోసే మాట కంటే మౌనమే ఎంతో నయం

శిశిబింబమూ నా చెలియ లాగే ఎపుడు ఏ కళనుండునో ?
బహురూపి యగు జాబిల్లి కంటే తారలే ఎంతో నయం

చురకత్తులకు మరు రూపమేమో తెలుసుకొని చేయందుకో
గో రూపి యగు పులి చెలిమి కంటే, వైరమే ఎంతో నయం

ఎన్నెన్ని గోడలు, ముళ్ళ కంచెలు తీరునా భూ దాహము!
ధనికునకు సొత్తగు పుడమి కంటే గగనమే ఎంతో నయం

మమకారమును రుచి చూపి ప్రేయసి పయనమైనది ఎచటికో ?
మోహాన్ని పెంచే ముద్దు కంటే గాయమే ఎంతో నయం

ఏ మందు లేనిది ప్రేమ జబ్బని తెలిసె "పెన్నా" నేటికి
లోలోన కాల్చే ప్రేమ కంటే మరణమే ఎంతో నయం