అన్ని వేదములోనె ఉన్నవి.....

దేహయంత్రములోని తంత్రము, దేహికైనా తెలియునా !
సారథిని రథమే నడుపు వైనం, దారికైనా తెలియునా !

వేదములు, మహిమలు, మతము ఉనికికి మూలమన్నది అసత్యం,
మృత్యు భయమే మూలమని, ఆస్తిక వాదికైనా తెలియునా !

అన్ని వేదములోనె ఉన్నవి, కాని గతి అప్రాచ్యమే !
కులభేదమే మన సృష్టి, చతుర్వేదికైనా తెలియునా !

దేవునికి, మనిషికి నడుమ వారథిలోనె కలదు కుతంత్రము !
స్వరము తప్పని మంత్ర భావం, పూజారికైనా తెలియునా !

ఒక్క భాషే ఎరుగు దేవుడు, సర్వ సృష్టికి మూలమా !
భూసురుల వంచన, పచ్చి హిందూ వాదికైనా తెలియునా !

వేయి పడగల నాగరాజులు, విషము చిమ్ముటె ధర్మము !
ఆ శేష శయనుని కరుణ ఇది, బహుజనులకైనా తెలియునా !

అమానుషమ్మగు దోపిడీకే, కులపు నిచ్చెన నీతులు !
ఇన్ని వ్యూహపు చతురతలు, ఏజాతికైనా తెలియునా !

'దైవ' భాషను వదలి, విప్రులె మ్లేచ్ఛ భాషలు నేర్చినారు,
'స్వధర్మ' మంటే ఏమిటో, గాయత్రికైనా తెలియునా !

***************

"శిశిర వల్లకి" (2012) గజళ్ళ సంపుటి నుంచి...

వేరే ఉంది - గజల్ - Abd Wahed

మనసు దూదిలా తేలిపోవడమే కాదు వేరే ఉంది
బతుకు హాయిగా గడిచిపోవడమే కాదు వేరే ఉంది

నా కన్నీటిని నీ కనుచూపుతో తుడవాలనుకున్నా
నా చూపుల్లో కాలిపోవడమే కాదు వేరే ఉంది

ప్రేమశిఖరాల పైకెగబ్రాకినా నిలబడాలని లేదా
సుమగంధాలు రాలిపోవడమే కాదు వేరే ఉందీ

చేతికి దొరకక అద్దంలోతులో కనిపిస్తూ ఉన్నా
ప్రతిబింబాలు పారిపోవడమే కాదు వేరే ఉంది

వలపుతలపులే లోకంగా మారిపోతే నీ లోనా
ప్రేమమత్తుగా వాలిపోవడమే కాదు వేరే ఉంది

కురుల నీడలో చెంపలవెలుగులో నిశ్చింతలు భ్రమలే
గుండెఎండలో మండిపోవడమే కాదు వేరే ఉంది

ఆకలిదప్పుల తీరాల మధ్యన ప్రవహించే నదిలో
ప్రేమగా దియా మునిగిపోవడమే కాదు వేరే ఉంది

గజల్ - Abd Wahed

తమలపాకు పాదాలపై తుమ్మెదలా చూపులన్ని వాలుతూనే ఉన్నవి
మనసులోని మాటలన్ని గట్టుతెగిన ఏరులాగే ఉరుకుతూనే ఉన్నవి

మొలకెత్తిన జ్ఙాపకాల కంటితేమ మంచులాగ గడ్డకట్టి భద్రంగా
దాచుకున్న చందమామ నవ్వులన్ని వెన్నలాగ కరుగుతూనే ఉన్నవి

తనసిగలో చీకట్లను తురుముకున్న రాత్రికన్య నుదుటిపైని జాబిలిని
చేయిచాచి సాగరాలు మనసులోని ఆశలాగ పిలుస్తూనే ఉన్నవి

ప్రాణాలను బలిపెడుతూ ఎగురుతున్న పురుగులనే తదేకంగ చూస్తున్న
గుండెల్లో పొగచూరిన దివ్వెలన్నీ అసూయతో కాలుతూనే ఉన్నవి

చెట్టుకింద కూలబడిన నీడలాగ నడుంవిరిగి నినాదాలు కూర్చున్నా
ఎగరలేక పాకుతున్న ఏరులన్నీ కన్నీళ్ళను కార్చుతూనె ఉన్నవి

నానావిధ ఫిర్యాదుల గుట్టల్లో మేనుమరిచి నిదురిస్తూ హాయిగా
తోటలోని పిట్టలన్ని గుట్టుగానె బతుకుబండి నెట్టుతూనె ఉన్నవి

చలిగాలి విసనకర్ర చేతబట్టి మల్లెపొదల వేడిసెగల నార్పినా
మట్టిలోన సువాసనల చినుకులేవొ రగులుతూనె ఉన్నవి

గజల్ - Abd Wahed

NTR గారికోసం Abd Wahed గారు ప్రత్యేకంగా రాసిన గజల్
* * *


ముత్యంలాంటి మనిషివినీవే సత్యంలా వెలిగావు
విలువలకొరకు పదవిని వదిలి ఆదర్శంగా వెలిగావు

రాముడివైనా కృష్ణుడివైనా నీవేగా రామయ్యా
నీరూపాన్నే దైవమనుకొనే అవతారంలా వెలిగావు

వెండితెరపైనా వెలుగులవానై మనసుల్లో కురిసావు
నటసార్వభౌమా ప్రతిభకు నీవే ప్రతిరూపంలా వెలిగావు

కూడూగూడూ లేని పేదలకు అండదండగా నిలిచావు
రెండ్రూపాయల బియ్యంతోనువు అన్నదాతలా వెలిగావు

గాంధీచెప్పినమద్యనిషేధం మర్చేపోయిన కాలంలో
మద్యంపీడను విరగడ చేసిన నవగాంధీలా వెలిగావు

ఆకాశంలో సగభాగానికి ఆస్థిలో కూడా సగముంది
వనితలబ్రతుకులొ చీకటి తరిమిన మణిదీపంలా వెలిగావు

పరిపాలనను ప్రజలవద్దకు పంపినవాడివి నీవేగా
ఋషితుల్యుడివి జీవితమంతా ప్రయోజనంలా వెలిగావు

అవినీతెరుగని రాజనీతికి చిరునామావై బ్రతికావు
పరువుప్రతిష్టల తెలుగుజాతికి ఘనచిహ్నంలా వెలిగావు

ప్రతి రేయి చితిలా......Shivaramakrishna Penna,

         

ఎందుకో! ప్రతి రేయి చితిలా రగులుతూనేఉన్నది !
స్మృతుల గంధపు చెక్కలా మది కాలుతూనే ఉన్నది !

ఎపటికప్పుడు శిశిర వృక్షము లాగ 'పెన్నా' నిలిచినా,
ఒక స్వప్నమేదో బతుకుతో కలహించుతూనే ఉన్నది !

మనసు నిత్యం దేహమునకు పరీక్షలెన్నో పెట్టినా,
గయ్యాళి మదితో దేహమింకా వేగుతూనే ఉన్నది !

మబ్బు చాటున దాగి, జాబిలి దోబూచులాడుతు ఉన్ననూ,
నింగి తారల కొంగు, నను చుంబించుతూనే ఉన్నది !

దేనికీ దుఃఖించ నంటూ బీరాలు పలికే వేలనోయీ!
గుండె మాటున అశ్రువూ విలపించుతూనే ఉన్నది !

పక్షి వెతలను చూడగా, తన బంధనాలూ తెలిసెను !
పంజరము కూడా రెక్కలను ఆశించుతూనే ఉన్నది !

సూర్య చంద్రులు కూడ ముక్తిని కోరితే ఫలముండునా!
లోలకంలా భాను బింబం ఊగుతూనే ఉన్నది !

ఇద్దరము ఇరు దిగంతాలుగ నిలిచినా వగపెందుకు?
ఇంద్ర చాపము లాగ, గజలే కలుపుతూనే ఉన్నది !

----16.11.2013

నాలోపల-Abd Wahed

మనసెందుకో ఈరోజిలా ఆరిపోయింది నాలోపల
చీకట్లలో ఒకరాత్రిలా జారిపోయింది నాలోపల

ఈగాలిలో ఉండాలిగా స్వరచిత్రాలతో ఒకవెన్నెల
ఆకాశాలలో జాబిల్లిగా మారిపోయింది నాలోపల

ఏకాంతాలలో నిర్వేదనా మరుభూమిలో ఒక రోదనా
చిరుజల్లులా మురిపాలతో వెలిసిపోయింది నా లోపల

గాయాలలో దాచేసినా మనోభావాల సిరి సంపదా
ఒక జ్ఙాపకం కన్నీరుగా కురిసిపోయింది నా లోపల

వినువీధిలో ఏకాకిగా తిరుగుతున్నాడు ఆ చంద్రుడు
ఆ వెన్నెలే నీ మాటగా మురిసిపోయింది నా లోపల

బంధాలలో నిర్విర్యమే అనుబంధాల సంవేదన
పెనుఘోషలో మది కెరటమే అలిసిపోయింది నా లోపల

ప్రతి మౌనమూ ఒక రాగమే, అనర్ధాలకూ ఒక అర్ధమె
ఈ దీపమే చీకట్లవల విసిరిపోయింది నాలోపల

గజల్ ఫైజ్ రాసిన ఉర్దూ పంక్తులు

...............Abd Wahed

ఈ రోజు మొదటి కవిత ఒక గజల్. గజల్ నిబంధనలను పాటిస్తూ అనువదించాలనుకోవడం ఒక పెద్ద సాహసమే అవుతుంది. అయినా ఫైజ్ రాసిన ఈ గజల్ ను సాధ్యమైనంత వరకు గజల్ ప్రక్రియలోనే అనువదించడానికి ప్రయత్నించాను. గజల్ లోని శబ్ధమాధుర్యం కూడా భావానికి బలాన్నిస్తుంది.

కష్టాలకు వివరణలూ లేనేలేవు కదా
మనోవ్యధకు సాంత్వనలు లేనే లేవు కదా

మరోసారి వాగ్దానం నిలబడనే లేదు
మరోసారి మాట నిజం కానేలేదు కదా

అమరత్వపు అనుమతులు పురుగులకూ లేవు
దీపాలకు ఒక్కరాత్రి రానేలేదు కదా

మత్తు రుచికి ముందే మనసు ఎగసిపడుతోంది
పరాకాష్ఠ ఈ గోష్ఠిలొ పలకనె లేదు కదా

తపిస్తున్న కళ్లముందు ఒక్కచూపు మెరిసి
కలవలేని రాత్రి గడిచి పోనేలేదు కదా

వ్యాజ్యాల ద్వారాలూ మూతపడే వేళ
మొత్తుకోళ్ళ నోళ్ళు మూత పడనె లేదు కదా

ప్రతిరోజూ ఫైజ్ నీకు కాళరాత్రి కదా
ఒక్కసారి పరిహారం దొరకనె లేదు కదా

ఫైజ్ రాసిన ఉర్దూ పంక్తులు

షరహ్ బేదర్దీ హాలాత్ న హోనే పాయీ
అబ్ కే భీ దిల్ కీ ముదారాత్ న హోనే పాయీ

ఫిర్ వహీ వాదా జో ఇక్రార్ న బన్ నే పాయా
ఫిర్ వహీ బాత్ జో అస్ బాత్ న హోనే పాయీ

ఫిర్ వో పర్వానే జిన్హే ఇజ్నే షహాదత్ న మిలా
ఫిర్ వో షమేం కె జిన్హే రాత్ న హోనే పాయీ

ఫిర్ వహీ జాం బల్బీ లజ్జత్ మై సు పహలే
ఫిర్ ఓ మహ్ఫిల్ జో ఖరాబాత్ న హోనే పాయీ

ఫిర్ దమ్ దీద్ రహే చష్మ్ ఓ నజర్ దీద్ తలబ్
ఫిర్ షబ్ వసల్ ములాఖాత్ న హోనే పాయీ

ఫిర్ వహాం బాబ్ అసర్ జానియే కబ్ బంద్ హో
ఫిర్ యహాం ఖతమ్ మనాజాత్ న హోనే పాయీ

ఫైజ్ సర్ పర్ జో హర్ ఇక్ రోజ్ ఖయామత్ గుజరీ
ఎక్ భీ రోజ్ మకాఫాత్ న హోనే పాయీ