పాడలేని పాట.......పెన్నాశివరామకృష్ణ

పాడలేని పాట పదును ముల్లైపోయింది
నీవు లేని బతుకు కలత నిదురై పోయింది

దూతగ నా మనసునేల పంపితినో కాని
తిరిగి రాక నీ సిగలో విరియై పోయింది

నిన్ను చూడరాలేదని అంత కోపమేలా?
నీవు పయనమైన గడియె సిలువై పోయింది

మల్లెలుగా కురులలోన ముడుచుకుంటివేమో !
నా నింగిని ఒక్క తార కరువై పోయింది

నిద్ర రాని రాత్రి ఏ కావ్యమో చదువబోతే
ప్రతి పుట నీ ఛాయాచిత్రమై పోయింది

బాధ కూడ బహుమతి కద "పెన్నా" ఈ వేళ !
చెలి వేసిన శిక్ష నేడు గజలై పోయింది