ఆ రాత్రి - జాన్ హైడ్ కనుమూరి గజల్

కలలోనైనా మెలకువనైనా గుర్తుండేదీ ఆ రాత్రి
నీతో నడచీ అలుపును మరచీ సాగినదీ ఆ రాత్రి

నిన్ను నన్నూ కలిపినదెవరో తెలిసేలోగా 

కాలం పరిచిన తిన్నెలపై వెన్నెల పరచినదీ ఆ రాత్రి

నిట్టూర్పు సెగలతో క్షణాలు యుగాలుగా
నీకై వేచివున్న మదిగదిని రెప్పవేయనిదీ ఆ రాత్రి

శిశిరానికి ఆకురాలిన కొమ్మను నేనై
పొటమరింతల చిగురుకై ప్రసవవేదనైనదీ ఆ రాత్రి

హోరు గాలిలోచిక్కి ఒంటరైన పక్షికి
దిగులుగా గుబులు గుబులుగా గడచినదీ ఆ రాత్రి

కలలుకన్న తనువున నిదురనే తరిమి
వేలవేల వీణెలు మీటిన సంగీతమైనదీ ఆ రాత్రి

ఎదురెదురు రేవులలో కలవలేని కనులుగా
దరి చేరని నది అలలపై ఊగి ఊగి సాగినదీ ఆ రాత్రి

అప్పగింతల పర్వమే తెగిన శాశ్వత బంధంగా
తలచి తలచి వర్షించే కనులతో తడిసినదీ ఆ రాత్రి

నెలరాజునిండిన తోటలో రేయంతా పాటగా
కూజానువొంపిన గజళ్ళతో కడుపు నిండినదీ ఆ రాత్రి

కె.కె.// ప్రేమ-గజల్//

కాదని అనగలనా...తనప్రేమే నడిపిస్తోందంటే,
కాదని అనగలనా... ఎడబాటే వేధిస్తోందంటే

చెంతలేకున్నా, వలపు సంకెలేసిందేమో,
కాదని అనగలనా... చెలిరూపం ఛేదిస్తోందంటే

ఏ మంత్రమున్నదో ఏమో... మతిపోయి తిరుగుతున్నాలే,
కాదని అనగలనా... చిరునవ్వే ఆడిస్తోందంటే

కొమ్మలూగుతున్నా, పలకరింపు లాగున్నాదే
కాదని అనగలనా... చెలిఊహే లాలిస్తోందంటే

గుండె సవ్వడైనా, కొండ పేల్చినట్టుందే,
కాదని అనగలనా... తన మౌనం కాలుస్తోందంటే

ఎదురుచూపులెన్నున్నా, గెలుపుంది 'కోదండ'
కాదని అనగలనా... నీ విరహం సుఖమేనంటుంటే ======Date: 14.02.2014
https://soundcloud.com/#kodanda-rao/love-is-divine

ఇంకా గుర్తుందిలే - గజల్ - జాన్ హైడ్ కనుమూరి

అలా అలా దాగిన జలతారు పరదాలచాటు ఇంకా  గుర్తుందిలే

గల గలా సాగిన నవ్వులతీరు పూలైనచోటు ఇంకా గుర్తుందిలే

నీకై నిరీక్షించి నిరీక్షించిన ఆ సాయంకాలం

కనులెదుటే మెరుపులా వచ్చిపోయిన జాడ ఇంకా గుర్తుందిలే!

పరాకుగా విదిల్చిన మాటకు నొచ్చుకున్నావో లేదో

ప్రక్కకు తిరిగి గిర్రున రాల్చిన ముత్యపుబొట్టు ఇంకా  గుర్తుందిలే !

చిగురుతొడిగిన మొగ్గ సిగ్గులొలికిన నా బుగ్గ 

అందానికే అందమని చదివిన ఆనాటి కవిత ఇంకా గుర్తుందిలే!

గుబులుపెట్టిన ఆ నీలిమేఘం భళ్ళున రాలితే 

చెట్టునీడలో ఒదిగి ఒదిగి తడిన ఆ వాన ఇంకా  గుర్తుందిలే!  

బాటసారినై అలసి నీ గుమ్మాన దాహమడిగితే  

చిరునవ్వుల కూ'జాను'ఒంపి తడిపిన తీరు ఇంకా  గుర్తుందిలే !

**********25.4.2014

ఆశ - చల్లా గజల్

పూల సొగసు చూడాలని తోటకి ఆశ ప్రేమరుచులు పంచాలని తేటికి ఆశ కమ్మనైన రాగాలు వీచికలైతే వీనులకు సొకాలని పాటకి ఆశ ఇజాలన్నీ పోటీపడి భాషణలిస్తే నిజం లోనే ఒదగాలని మాటకి ఆశ వేసిన ప్రతి అడుగూ మంచికోసమైతే పాదాలను తాకాలని బాటకి ఆశ ఖరీదైన నైవేద్యాలెందుకోయి "చల్లా" దైవస్మరణ చేయాలని నోటికి ఆశ

ఆ వెన్నెల...కన్నెగంటి వెంకటయ్య -గజల్

ఆ వెన్నెల వెలుగును చూసి ఎంతగా మురిసిపోతిని..!?
ఈ వన్నెల తెలుగును చూసి అంతగా మురిసిపోతిని..!!
//ఆ వెన్నెల//

తెలుగు చంద్రకళలను సాంతం పరభాషా రాహువు పట్టి
నమిలి మింగె తీరును చూసి ఎంతగా కుమిలి పోతిని.
//ఆ వెన్నెల//

సహజ తెలుగు వెన్నెల ముందు కృత్రిమ వెలుగులు నిలబడవని
గ్రహించని ద్రోహుల చూసి ఎంతగా రగిలి పోతిని.
//ఆ వెన్నెల//

తెలుగు జాబిలమ్మకు భయపడి పరభాషాచీకటి తొలిగి
రాబోయే జిలుగును చూసి ఎంతగా ఆశపడితిని.

//ఆ వెన్నెల//

తెలుగు సూర్యపుత్రుల కాంతి తెలుగు చందమామ సజీవం
కన్నెగంటి కన్నుల చూసి ఎంతగా హర్షించితిని.
//ఆ వెన్నెల//

17.4.14.

చల్లా గజల్

ఎక్కడో చిరుజల్లు పడితే ఇక్కడెందుకు గొడుగు పడతావు

ఎక్కడో పారేటి నీటికి ఇక్కడెందుకు చాల్లు కడతావు

గాయమొకరికి వైద్యమొకరికి రోగమెప్పుడు కుదుట పడును
మనసుకే అవినీతి కుడితే మనిషికెందుకు మందు పడతావు

సొమ్ము ఒకడిది షొకు ఒకడిది దేశమెప్పుడు బాగుపడును
పొరుగునే పూరిళ్ళు ఉన్నా పరులకెందుకు మేడ కడతావు

బాధలొకరివి భాగ్యమొకరిది సమత మమతలు ఎక్కడున్నవి
ఆకలంటూ ఆర్తినొందే వారికెందుకు కడుపు కొడతావు

కలం ఒకరిది కవిత ఒకరిది మొసమైనా ఓయి "చల్లా"
కీర్తికోసం ఎన్ని జిత్తులో తెలిసి ఎందుకు బాధపడతావు

17.4.2014

|| జ్యోతిర్మయి మళ్ళ || గజల్

మనసునేలు మాధవుడిని తలవాలని ఉండదా
ప్రాణమిచ్చు ప్రేమికుడిని కలవాలని ఉండదా

మెరుపుతీగవంటు నన్ను మురిపెముగా పిలిచితే
మురిసిపోతు చెంతచేరి నిలవాలని ఉండదా

తమలపాకులంటు కళ్ళకద్దుకుంటె పదములు
ధన్యములై చేతులెత్తి కొలవాలని ఉండదా

అమృతమంటు మధువు అంటు అధరముల పొగిడితే
పరవశించి పెదవి విప్పి పిలవాలని ఉండదా

నవ్వుముఖము దుఃఖములకు ఔషధమని తలచితే
సర్వమోడియైన నువ్వే గెలవాలని ఉండదా

ముద్దబంతివి పూలరెమ్మవి జాబిలి నీవంటుంటే
మరలమరల ఈ నేలనే మొలవాలని ఉండదా

(20-3-14)

అద్దేపల్లి - గజల్

Courtesy:  http://www.koumudi.net/Monthly/2014/march/index.html

చూద్దామా-Abd Wahed- గజల్

అలల కంటిలో కమ్మనికలగా మారి చూద్దామా
గుండెలోతులో వలపులవలగా జారి చూద్దామా

కనురెప్పలపై ఎదురుచూపులే దీపాలైతే
ముళ్ళబాటపై పాతనవ్వులను ఏరి చూద్దామా

నీవు నీవుగా నేను నేనుగా బతుకుతు ఉన్నా
ఎడబాటు ఎండలో కాస్తనీడను వెదికి చూద్దామా

మంచుపొరల్లో ఇసుకరేణువులు ముత్యాలేగా
రాతిమనసుపై చూపుల దుప్పటి పరచి చూద్దామా

ఎదలోతుల్లో వెచ్చని ఊపిరి వేడిసెగలతో
హృదయసీమలో చలిచీకట్లను తరిమి చూద్దామా

వేరే ఉంది - గజల్ - Abd Wahed

మనసు దూదిలా తేలిపోవడమే కాదు వేరే ఉంది
బతుకు హాయిగా గడిచిపోవడమే కాదు వేరే ఉంది

నా కన్నీటిని నీ కనుచూపుతో తుడవాలనుకున్నా
నా చూపుల్లో కాలిపోవడమే కాదు వేరే ఉంది

ప్రేమశిఖరాల పైకెగబ్రాకినా నిలబడాలని లేదా
సుమగంధాలు రాలిపోవడమే కాదు వేరే ఉందీ

చేతికి దొరకక అద్దంలోతులో కనిపిస్తూ ఉన్నా
ప్రతిబింబాలు పారిపోవడమే కాదు వేరే ఉంది

వలపుతలపులే లోకంగా మారిపోతే నీ లోనా
ప్రేమమత్తుగా వాలిపోవడమే కాదు వేరే ఉంది

కురుల నీడలో చెంపలవెలుగులో నిశ్చింతలు భ్రమలే
గుండెఎండలో మండిపోవడమే కాదు వేరే ఉంది

ఆకలిదప్పుల తీరాల మధ్యన ప్రవహించే నదిలో
ప్రేమగా దియా మునిగిపోవడమే కాదు వేరే ఉంది

ప్రతి రేయి చితిలా......Shivaramakrishna Penna,

         

ఎందుకో! ప్రతి రేయి చితిలా రగులుతూనేఉన్నది !
స్మృతుల గంధపు చెక్కలా మది కాలుతూనే ఉన్నది !

ఎపటికప్పుడు శిశిర వృక్షము లాగ 'పెన్నా' నిలిచినా,
ఒక స్వప్నమేదో బతుకుతో కలహించుతూనే ఉన్నది !

మనసు నిత్యం దేహమునకు పరీక్షలెన్నో పెట్టినా,
గయ్యాళి మదితో దేహమింకా వేగుతూనే ఉన్నది !

మబ్బు చాటున దాగి, జాబిలి దోబూచులాడుతు ఉన్ననూ,
నింగి తారల కొంగు, నను చుంబించుతూనే ఉన్నది !

దేనికీ దుఃఖించ నంటూ బీరాలు పలికే వేలనోయీ!
గుండె మాటున అశ్రువూ విలపించుతూనే ఉన్నది !

పక్షి వెతలను చూడగా, తన బంధనాలూ తెలిసెను !
పంజరము కూడా రెక్కలను ఆశించుతూనే ఉన్నది !

సూర్య చంద్రులు కూడ ముక్తిని కోరితే ఫలముండునా!
లోలకంలా భాను బింబం ఊగుతూనే ఉన్నది !

ఇద్దరము ఇరు దిగంతాలుగ నిలిచినా వగపెందుకు?
ఇంద్ర చాపము లాగ, గజలే కలుపుతూనే ఉన్నది !

----16.11.2013

గజల్ -

యువత గొంతు కొత్త పాట పాడాలనుకుంటున్నది
నవత గంతు కొత్త ఆట ఆడాలనుకుంటున్నది

నిన్న మొన్న అవలి మొన్న ఎన్నెన్నో అనుభవాలు
అన్నింటితొ కొత్త బాట రావాలనుకుంటున్నది

తూర్పు పడమరలు ఏకం అవుతున్నవి రోజు రోజు
మార్పులతో కొత్త తోట ఎదగాలనుకుంటున్నది

అంతరిక్షసీమ నేడు ఆటల మైదానమాయె
విజ్ఞానం కొత్తకోట కట్టాలనుకుంటున్నది

మతము జాతి ఆవలివైపు మానవతా మకుటంతో
'మోహన' ఒక కొత్త మాట పుట్టాలనుకుంటున్నది

వాధూలస 28/9/13

ఇందిర || గజల్ ||

గజల్ కొ అప్నే దిల్ సే ఆనేదీజియే
ఆఁసూ భీ థోడా మిల్ కే ఆనేదీజియే

దర్ద్ హి అప్నీ సాథీ బన్ చల్తే వక్త్
తారె హఁసీ జిల్మిల్ కే ఆనేదీజియే

రాత్ కి ఆంధీ ఠక్రాయీతో క్యా
సుబహ్ కె ఆశా ఖిల్ కే ఆనేదీజియే

దునియా బిఛాయీ కాంటే ఇందుకి రాస్తేమే
జీత్ కి జిద్ కో జల్ కే ఆనేదీజియే

*** 21-09-2013

'వాధూలస' - గజల్

Rammohan Rao Thummuri

ఎంచుకుంటూ పోతె ఎన్నెన్నొ లోపాలు
తలచుకుంటే చాలు గుండెల్లొ గునపాలు

రగులుతున్నవి ఎదలు పగలతో సెగలతో
స్వార్థమున్నప్పుడే కోపాలు తాపాలు

నిన్ను నీవొకసారి లోలోన చూసుకో
ఎన్నగలవా ఎవరిలోనైన లోపాలు

మానవుని సేవయే మాధవుని సేవగా
మనసార ఎంచితే మలిగేను పాపాలు

'మోహనా' చంద్రునిలొ మచ్చ చూడకుమోయి
విరియు వెన్నెలలోన ఎన్నెన్ని మురిపాలు

17/9/2013

ఇందిర || గజల్ ||

ఏది ఏది ఎక్కడుంది స్త్రీ జాతికి రక్షణ?
గంగలోన కలుస్తోంది నరజాతి విచక్షణ

తల్లి ఎపుడు రంగరించు ఉగ్గుపాల ప్రేమనే
మరిఏడ నేర్చినాడో ఈ మాన ప్రాణ భక్షణ

సృష్టిలోన మహోన్నతుడు మనిషేకద ఇందిర
ఇపుడే జంతువులివ్వాలో విలువలకై శిక్షణ ?

కురుసభలో దించుకున్నతలలు ఎత్తలేదింకా
మనుషులుగా పరిగణించు రోజుకై నిరీక్షణ

25-08-2013

గజల్ - varchaswi.laxman

 .......................
:గజల్:
.......................

రెండు పాదాలు కలుపుకుంటే ఒక ‘శేరు’గా రావాలి
గజల్లో మొదటి షేరు పేరైన ‘మత్లా’గా రావాలి

మత్లా లో ప్రతిపాదానికి అంత్యపదమే ‘రదీఫ్’
అర్ధమున్న ఏకాక్షరమో, పదమో రదీఫులుగా రావాలి.

మిగతా శేరుల్లో మొదటి పాదమెలాగున్నా
రెండో పాదాంతం ఖచ్చితంగ రదీఫుగా రావాలి.

నాలుగు మించి శేరులెన్నొ గజల్లో జోడించు
ఆఖరి శేరు మటుకు మనం పిలుచుకునే ‘మఖ్తా’గా రావాలి.

మఖ్తా మొదటి పాదం చివరి పదం చూడు చిత్రంగా
ఏమేమో కాదది నీ నామమె - అది ‘తకల్లుఫ్’గా రావాలి.

ఇక గజల్లో సౌందర్యం చెప్పవేమి వర్చస్వీ
ప్రతి రదీఫు ముందు అక్షరమో పదమో ‘కాఫియా’గా రావాలి.

............ధన్యవాదాలు....................
http://www.facebook.com/varchaswi.laxman

యశస్వి రాసిన యు బెండ్ - కవితకు గజల్ రూపం

కొండవాలు దారి మలుపులో ఎదురెదురు ప్రయాణాల్లో తలతిప్పి చూసా
బ్రతుకుబండి బయటేకదా నీ చూపులు చివరిసారిగా మెలేసాయని చూసా.

విడివిడిగానైతేనేం ఒక్కదిక్కుకే పోతున్నామనుకున్నా
నువ్వావైపు నేను ఈవైపని గుర్తించేలోగా కనుమరుగయ్యావని చూసా

చేతుల్లో మిగిలిందల్లా గుప్పిట నిండిన గుండె సలపరమే
ఆలోచనంతా తిరుగుప్రయాణం మీదే క్షణమైనా మళ్ళీ కలుస్తామాని చూసా

నే పైకి నువ్వు కిందకీ చూపులకందకుండా ఏమిటీ రాకపోకలు
మలుపులే తప్ప మజిలీలు లేవు మరోక్షణం తట్టుకోవడమెలానని చూసా

ఎక్కడ ఆగాలో ఎంతకాలమిలా సాగాలో! తెలిసేదెలా!!
యసస్వినిలిచిన బాటలో నిలిచి కలలరాణివై ఎదురొస్తావని చూసా!


----
Original Poem

యశస్వి  || యూ బెండ్ ..||

కొండవాలు దారి మలుపు లో
ఎదురెదురు ప్రయాణాల్లో
తలతిప్పి చూసా..

బ్రతుకు బండి బయటేకదా!
నీ చూపులు నన్ను..
చివరిసారిగా.. మెలేసాయి.

విడివిడిగానైతేనేం
ఒక్కదిక్కుకే
పోతున్నామనుకున్నా..

నువ్వు పైకి.. నేకిందకీ
అని గుర్తించేలోగా
కనుమరుగయ్యావు..

చేతుల్లో మిగిలిందల్లా..
గుప్పిట నిండిన..
గుండె సలపరమే

ఇక ఆలోచనంతా
తిరుగుప్రయాణం మీదే..
ఒక్క క్షణమైనా..మళ్ళీ కలుస్తామా!!

నే పైకి.. నువ్వు కిందకీ..
కంటిచూపులకందకుండా..
ఏమిటీ రాకపోకలు..

మలుపులే తప్ప
మజిలీలు లేవు..
తట్టుకోవడమెలా!!

ఎక్కడ ఆగాలో..
ఎంతకాలం ఇలా సాగాలో!
తెలిసేదెలా!!

==11.06.2013==

ఇంకా యెన్నాళ్ళు - గజల్ - బి. ఇందిర(ఇల్లందు)

బి. ఇందిర(ఇల్లందు) మనిషిని మనిషే చంపే వాదం - ఇంకా యెన్నాళ్ళు ఏ పరమార్థం కోరని క్రోథం - ఇంకా యెన్నాళ్ళు! సాంత్వన తీర్చే సాయం సంధ్యలు పలికే గీతికలో నరాలు తెంపే విషాద నాదం యింకా యెన్నాళ్ళు ద్వేషం అంటే తెలియని ఆశా జీవులె అందరూ అమాయకులపై హింసా వాదం యింకా యెన్నాళ్ళు పేరేదైనా మానవ జాతికి వేరొకటి కాదా మనుగడ కొమ్మన మనలో బేధం యింకా యెన్నాళ్ళు రేపటి వేకువ కోసం సాగే అడుగులు ఇందిరా పొంచిన మృత్యువు ఆడే జూదం యింకా యెన్నాళ్ళు 30.3.2013

సమాంతర రేఖ //మీరజ్ ఫాతిమా ఘజల్ //

 కాలం నిలిపింది నను అలుపెరుగని బాటసారిని చేసి
మౌనం వుంచింది నిను కలవలేని సమాంతరరేఖను చేసి

నా గుండె నిండిన నీ తలపు ఆవిరై
ఆశ్రువులా జారింది వెచ్చగా వ్యధగా, " నను అభాగినిని చేసి "

నను నడిపించిన నీ చేయి దూరమై
ఎండమావై వెనక్కి వెళ్ళింది మెరుస్తూ మురిపిస్తూ " నను ఏకాకిని చేసి "

నా మనసును ఆవహించిన నీ వలపు
ఆశై చూపులో స్థిరించింది, నిశ్చలంగా నిరీక్షణగా " నను అనామికను చేసి "

నా అందమైన ఊహాలోకం నుండి నీ
స్వప్నం కరిగిపోతుంది, కాలుతూ జారుతూ " నను అవివేకిని చేసి "

నా అపురూప చెలిమి తరువునుండి నీ
స్నేహఫలం రాలిపోతుంది నిష్ఫలంగా నిర్దయగా " నను నిర్భాగ్యురాలినిచేసి "

అందమైన నా జీవన బాటలో నీ రాక మెరుపులా
మెరిసి మాయమైంది నీడలా నిరాశలా " నను అభిసారికను చేసి "

మానసిక మైదానంలో ఏకాగ్రతను వెతుకుతూ
చూపు చెదిరిపోతుంది,అలలా ఆవిరిలా " నను తాపసిని చేసి "

నా జీవితాన్ని నడిపించిన నీ జ్ఞాపకం
నిన్నలో నిలుస్తుంది, మసగ్గా మాయగా " నను నిరాధారిని చేసి "



*******
కొన్ని సార్లు మనం రాసి వాటిలో అన్నీ మనకే తెలియకోవచ్చు చదువుతున్న పాఠకునికి కొత్త కొత్త రూపాలు, భావనలు కలగొచ్చు. అలాగే ఇది కవిత అని రాసారు, కాని ఇది ఘజల్ రూపమని నాకు అనిపించి ఇలా మీముందుకు

బోసినవ్వు - కె. కె - గజల్,

బోసినవ్వు విసురుతాడు, మంచు కురిసినట్లుగా,
చిన్నిముద్దు చిలుకుతాడు,మనసు తడిసినట్లుగా,

విరిగినవి, చిరిగినవి పారేస్తుంటే,
భద్రంగా దాస్తాడు, నిధులేవో దొరికినట్లుగా,

అరచేతిని ఆకుచేసి, అన్నం పెడుతుంటే,
నలుమూలల తిరుగుతాడు, తననెవరో తలచినట్లుగా,

ముద్దు,ముద్దు మాటలతో కధలే చెబుతుంటే,
ప్రశ్నలెన్నో అడుగుతాడు, నా మనసే అలసినట్లుగా,

నా చేతిని ఊతచేసి, నడిపిస్తుంటే,
పరుగులు పెడుతుంటాడు, జగమంతా గెలిచినట్లుగా,

అందమైన అల్లరితో అలరిస్తుంటే,
కలుసుకో కోదండ, నీ బాల్యం పిలిచినట్లుగా