Thursday, November 21, 2013

ప్రతి రేయి చితిలా......Shivaramakrishna Penna,



         

ఎందుకో! ప్రతి రేయి చితిలా రగులుతూనేఉన్నది !
స్మృతుల గంధపు చెక్కలా మది కాలుతూనే ఉన్నది !

ఎపటికప్పుడు శిశిర వృక్షము లాగ 'పెన్నా' నిలిచినా,
ఒక స్వప్నమేదో బతుకుతో కలహించుతూనే ఉన్నది !

మనసు నిత్యం దేహమునకు పరీక్షలెన్నో పెట్టినా,
గయ్యాళి మదితో దేహమింకా వేగుతూనే ఉన్నది !

మబ్బు చాటున దాగి, జాబిలి దోబూచులాడుతు ఉన్ననూ,
నింగి తారల కొంగు, నను చుంబించుతూనే ఉన్నది !

దేనికీ దుఃఖించ నంటూ బీరాలు పలికే వేలనోయీ!
గుండె మాటున అశ్రువూ విలపించుతూనే ఉన్నది !

పక్షి వెతలను చూడగా, తన బంధనాలూ తెలిసెను !
పంజరము కూడా రెక్కలను ఆశించుతూనే ఉన్నది !

సూర్య చంద్రులు కూడ ముక్తిని కోరితే ఫలముండునా!
లోలకంలా భాను బింబం ఊగుతూనే ఉన్నది !

ఇద్దరము ఇరు దిగంతాలుగ నిలిచినా వగపెందుకు?
ఇంద్ర చాపము లాగ, గజలే కలుపుతూనే ఉన్నది !

----16.11.2013