వేరే ఉంది - గజల్ - Abd Wahed

మనసు దూదిలా తేలిపోవడమే కాదు వేరే ఉంది
బతుకు హాయిగా గడిచిపోవడమే కాదు వేరే ఉంది

నా కన్నీటిని నీ కనుచూపుతో తుడవాలనుకున్నా
నా చూపుల్లో కాలిపోవడమే కాదు వేరే ఉంది

ప్రేమశిఖరాల పైకెగబ్రాకినా నిలబడాలని లేదా
సుమగంధాలు రాలిపోవడమే కాదు వేరే ఉందీ

చేతికి దొరకక అద్దంలోతులో కనిపిస్తూ ఉన్నా
ప్రతిబింబాలు పారిపోవడమే కాదు వేరే ఉంది

వలపుతలపులే లోకంగా మారిపోతే నీ లోనా
ప్రేమమత్తుగా వాలిపోవడమే కాదు వేరే ఉంది

కురుల నీడలో చెంపలవెలుగులో నిశ్చింతలు భ్రమలే
గుండెఎండలో మండిపోవడమే కాదు వేరే ఉంది

ఆకలిదప్పుల తీరాల మధ్యన ప్రవహించే నదిలో
ప్రేమగా దియా మునిగిపోవడమే కాదు వేరే ఉంది